Di Federal Road Safety Corps (FRSC) say dem go prosecute Habeeb Hamzat, wey pipo sabi as Peller for reckless driving.

Dis na afta e film imsef as e crash im car on Sunday.

For one press release wey Corps Public Education Officer, Assistant Corps Marshal Olusegun Ogungbemide issue, FRSC Corps Marshal, Shehu Mohammed, show serious concern about wetin e call growing habit of reckless driving by some celebrities and social media influencers because dem wan get online attention.

While e call on di actors guild, content creators, influencers and entertainment associations make dem warn dia members against dangerous road behaviour wey fit put lives for danger.

"Di way some celebrities, content creators and social media influencers dey use road anyhow, dey break traffic rules on purpose just to get online attention, dey very worrying and dey put lives for danger," di Corps Marshal tok.

According to di statement, di warning follow one video wey spread well-well online wey show popular TikTok streamer Peller, wia dem see am dey do live streaming while driving wey FRSC describe as illegal and very dangerous. Di streaming end wit road accident.

"Dis incident, wey fit don lead to loss of lives, dey remind us say fame no dey give anybody immunity from law, and e no be excuse to behave dangerous for public roads," Mohammed tok.

Di Corps Marshal stress say live streaming, content creation, recording or any activity wey go distract driver while driving na direct violation of traffic laws and e dey put oda road users for serious risk.

"Any kind live streaming, content creation or phone use while driving na clear violation of road traffic laws and e dey cause serious danger no be only to di driver but also to innocent pipo wey dey use di road," e warn.

FRSC don direct di Lagos State Sector Commander make e quickly start all necessary process to prosecute di person involved for reckless driving, phone use while driving and distracted driving, according to existing traffic laws.

"Celebrities and influencers get plenty influence, especially among young Nigerians, and dem suppose represent safety, no be recklessness," e tok.

E further warn say FRSC no go hesitate to enforce law against anybody wey dem catch dey drive reckless or distracted.

"FRSC go use full power of di law against any person, celebrity or not, wey dem catch dey do distracted or reckless driving. No social media content, online trend or small clout worth human life," Mohammed tok.

FRSC also remind di public say Nigerian roads na shared spaces wey laws dey guide to protect lives.

Di incident hapun on Sunday during one livestream wey go viral.

Peller, wey dey alone inside im Mercedes-Benz, show signs of distress as e dey also tok emotionally for phone call.

During di livestream, Peller tok say, "I go use dis car crash now," befor e add say, "I dey scared. I dey scared."

Di livestream show say later, e drive off and crash im car into one stone barrier, wey cause serious damage to di vehicle.

Peller na popular Tik Tok live streamer for Nigeria wit millions of fans on dat platform and across im oda online platforms.

View this post on Instagram

A post shared by Hamzat Habeeb Adelaja (@peller089)