De Bruyne ba zai buga wa City wasa da Aston Villa ba

Dan wasan Manchester City, Kevin de Bruyne ba zai wasan Premier League da Aston Villa ranar Laraba ba, sakamakon jinya.

An sauya dan kwallon tawagar Belgium a minti na 48 ranar Asabar a karawar FA Cup da Chelsea ta yi nasara da ci 1-0 a wasan daf da karshe a Wembley.

Manchester City ta sanar cewar: ''Kawo yanzu ba ta san girman raunin da ya yi ba, amma za a ci gaba da auna lafiyarsa.''

City wadda take ta daya a kan teburin Premier League za ta buga wasa uku cikin kwana tara.

Cikin wasa ukun da City za ta yi sun hada da na Premier League da za ta yi da Aston Villa ranar Laraba.

Daga nan ta kara da Tottenham a wasan karshe a Caraboa ranar Lahadi da fafatawar daf da karshe ta farko a Champions League da Paris St Germain ranar 28 ga watan Afirilu.

De Bruyne ya yi wasa 32 a dukkan fafatawa a bana a Manchester City, ya kuma ci kwallo takwas ya bayar da 15 aka zura a raga.

Haka kuma dan wasan yana daga kashin bayan tawagar Belgium da za ta kara a gasar cin kofin nahiyar Turai da za a fara daga 11 ga watan Yuni.