Za a buga El Clasico tsakanin Real da Barca a yau

Ranar Asabar, Barcelona za ta ziyarci Real Madrid domin buga wasan La Liga karawar hamayya da ake kira El Clasico.

Kungiyar Camp Nou ta yi wasan La Liga 19 ba a doke ta ba, kuma saura maki daya ta tarar da Atletico ta daya a kan teburin bana.

Ita kuwa Real wadda take ta uku a teburi da tazarar maki uku tsakanin da Barcelona ta kawo wannan matakin bayan kwazon da ta sa tun daga 10 ga watan Fabrairu.

Haka kuma Real Madrid tana taka rawar gani a Champions League, bayan da ta doke Liverpool a wasan farko a quarter finals ranar Talata a Spaniya.

Barcelona wadda ke kokarin komawa kan ganiya na ci gaba da sa kwazo, musamman kyaftin, Lionel Messi da ya zura kwallo 10 a wasa 12 a gasar La Liga a kwanan nan.

Real za ta buga karawar ba tare da kyaftin dinta Sergio Ramos wanda ke jinya da kuma Raphael Varane wanda ya killace kansa, bayan da ya kamu da cutar korona.

Sai dai watakila Eden Hazard da kuma Dani Carvajal su buga wasan, bayan da suka kammala jinya suka kuma koma atisaye.

Shi kuwa mai tsaron bayan Barcelona, Gerard Pigue wanda ke jinyar rauni a gwiwar kafa na ta kokarin ganin ya buga wasan na hamayya.