'Yan Barcelona da za su fafata da Valencia a La Liga

Valencia za ta karbi bakuncin Barcelona a wasan mako na 34 a gasar La Liga da za su kece raini ranar Lahadi.

Ranar 19 ga watan Disambar 2020, kungiyoyin suka fafata a wasan farko a kakar bana a Nou Camp inda suka tashi 2-2.

Barcelona tana mataki na uku a kan teburi da maki 71, Real ce ta biyu mai maki 74, yayin da Atletico Madrid mai jan ragama take da maki 76.

Ita kuwa Valencia wadda take ta 14 a kasan teburin La Liga na bana tana da maki 36.

Tuni kocin Barcelona, Ronald Koeman ya bayyana 'yan wasa 23 da zai fuskanci Valenci, har da Matheus Fernandes wanda ya sha jinya.

Wadan da ke yin jinya a Barcelona kawo yanzu sun hada da Martin Braithwaite da Philippe Coutinho da kuma Ansu Fati.

'Yan wasan Barcelona: Ter Stegen da Dest da Pique da R. Araujo da Sergio da Griezmann da Pjanic da Messi da O. Dembele da Riqui Puig da Neto da kuma Lenglet.

Sauran sun hada da Pedri da Trincao da Jordi Alba da Matheus da S. Roberto da F. De Jong da Umtiti da Junior da Ilaix Moriba da O. Mingueza da kuma Arnau Tenas.