Nurses and midwives for Nigeria don start industrial action [strike] across di kontri.

Di National Association of Nigeria Nurses and Midwives [NANNM] announce say di warning strike go last for 7 days.

Di strike go affect only federal goment hospitals and facilities. Di strike dey come afta di association give Nigeria goment 15 days ultimatum to address all di issues wey dey disturb dem.

For letter wey di General Secretary of di association Dr. Shettima sign, di nurses association tok say dem dey give goment 15 days ultimate to meet dia demands.

"Afta plenti tok-tok by di NEC-in session on di issues wey dey at stake, di house don resolve to give 15-day ultimatum to di Federal Ministry of Health so dat dem go address di demands wey we give dem."

Di strike wey suppose start on Monday 14 July, 2025 don start on Wednesday 30 July, 2025.

"If di goment fail to do di needful bifor di ultimatum expire, di association go start warning strike for 7 days," di nurses association bin tok.

Why di nurses and midwives association dey para

For di letter wey give goment notice about dia planned strike, di association say goment don neglect di needs wey di profession get for many years.

Dem say even though di association bin dey veri "understanding wit goment and employers to ensure say dem work togeda well for di past four decades", dia employers for all levels don remove di respect wey di profession get.

According to dem e don lead to "gross insensitiveness" to di legitimate demands of dia members and anytime dem wan go on strike dem dey tink about di needs of patients and clients.

"And e dey make us to painfully avoid di only language [strike] wey goment dey understand."

Medical experts say dis strike go affect patients wey need medical attention, especially pipo wey dey for intensive care and maternity wards for federal goment medical facilities.

"Patients no go receive nursing care. In oda words, dem no go get optimal care," Dr Weriwoyingepri Silver tell BBC News Pidgin.

Wetin di nurses and midwives association want?

According to local media for Nigeria, di association want goment to:

Chook eye for dia shift allowance and review am.
Adjust dia uniform allowance.
Dem want separate salary structure for nurses.
Dem want make goment increase dia core duty allowance.
Dem dey ask for mass employment of nurses.
Dem also want goment to open nursing department for di Federal Ministry of Health.
According to Punch, di National Chairman of di National Association of Nigerian Nurses and Midwives - FHI, Morakinyo Rilwan tok say, "As far as we dey concerned, goment neva communicate wit us till dis moment. Na why we dey tok say di strike gatz go on, and notin go stop am.

"Even if goment call today or tomorrow, e no go stop di strike. Dem bin get enuf time."

"Fifteen days bin dey enuf for dem to call us for negotiations. Na becos dem no dey sensitive to di welfare of di masses. Na why dem allow 15 good days to pass."

"For ova 40 years, we don dey patient wit dem. Dem subject us to no provision of gloves or equipment, and for di past 40 years, nurses neva go on any strike.

"And we bin give dem 15 days notice. Maybe dem dey look us like dat becos we neva go on strike for long now. But dem dey wrong," im tell Punch.

Oga Rilwan add say all dia members welcome di strike and na only Federal Medical Centre, Ebute-Metta and Lagos University Teaching Hospital, Lagos, no follow for di strike sake of say dem don comot from di union three years sake of some issues.

Health workers strike dey happun for Nigeria well-well sake of different sections of di sector wey dey call for goment to make tins beta for dem.

Under President Bola Tinubu administration, Minister of Health Prof. Mohammed Ali Pate bin tell BBC News Pidgin for October 2024 say dem dey try to avoid strikes and di way health workers bin dey go on strike don reduce.

For di exclusive interview, im bin tell BBC News Pidgin say dem bin don dey try to solve all di problems wey health workers dey carry come im dormot.

But surprisingly anoda strike dey here in less dan one year wey im bin give di assurance.