BBC Hausa of Wednesday, 25 October 2023
Source: BBC
Watakila Sergio Reguilon ya buga wa Manchester United wasan Champions League da FC Copenhagen a Old Trafford ranar Talata.
United na fama da 'yan wasan da ke jinya, wadda ta yi rashin nasara a wasa biyu cikin rukuni a gasar ta zakarun Turai.
Kungiyar Old Trafford wadda ke rukunin farko ta yi rashin nasara a gidan Bayern Munich, sannan Galatasaray ta doke ta a Old Trafford.
Tun can baya Requilon ya murmure, amma bai samu damar buga wasan Premier League ba ranar Asabar da United ta yi nasara, wanda ya kamu da rashin lafiya.
Idan Requilon ya koma taka leda zai kara karfin Manchester United, bayan da Sofyan Amrabat ya dinga buga gurbinsa lokacin da yake jinya.
United za ta buga wasan na ranar Talata cikin jimamin mutuwar Sir Bobby Charlton, zakakurin dan kwallon kungiyar.
Har yanzu kungiyar ba ta sanar da yadda za ta tsara yi masa ban kwana ba ga wanda ya lashe kofin duniya a 1966 tare da tawagar Ingila.
Za a yi shiru na minti daya, sannan dukkan 'yan wasa za su daura bakin kyalle kafin fara wasan a Old Trafford.
An yi butun-butumin Charlton a Old Trafford tare da Denis Law da George Best.