US President Donald Trump don described di recent Russia attack on Ukraine as a "horrible tin" while Germany's chancellor-in-waiting, Friedrich Merz, accuse Russia of committing war crime.

Russian Sunday missile attack on Ukrainian city of Sumy kill 34 pipo - including two children - and injure 117 odas.

Immediate official comment on di attack from Russia no dey. Tori be say dia forces across di nearby border dey prepare for major offensive.

Di attack dey come as di US, Ukraine strongest military ally, don dey pursue an end to di war - wey don reach four years - through negotiation under Trump.

Di US president say di attack dey "terrible" and dem tell am say "dem make mistake", but e no elaborate.

Earlier, Trump special envoy to Ukraine, retired Lt-Gen Keith Kellogg, say di attack cross "any line of decency".

Merz, wey dey expected to take over as Germany new chancellor next month, tell German public broadcaster ARD say di attack on Sumy constituted a "serious war crime".

"Na perfidious act.. and na serious war crime, deliberate and intended," di conservative politician tok.

Germany's outgoing Chancellor Olaf Scholz, meanwhile, say di attack show "just wetin Russia supposed readiness for peace worth".

On im own part, French President Emmanuel Macron accuse Russia of "blatant disregard of human lives, international law, and di diplomatic efforts of President Trump".

"Strong measures dey needed to impose a ceasefire on Russia," e tok. "France dey working tirelessly toward dis goal, alongside im partners."

European Commission President Ursula von der Leyen describe di attack as "barbaric" and add: "Russia remain di aggressor, in blatant violation of international law.

"Strong measures dey urgently needed to enforce a ceasefire. Europe go continue to reach out to partners and maintain strong pressure on Russia until di bloodshed end and a just and lasting peace dey achieved, on Ukraine terms and conditions."

British Prime Minister Sir Keir Starmer also give a view, as e tok say e bin dey "appalled at Russia horrific attacks on civilians for Sumy".

One tok-tok pesin for UN Secretary-General António Guterres say e dey "deeply alarmed and shocked" to learn of di missile attack.

"Attacks against civilians and civilian objects dey prohibited under international humanitarian law, and any such attacks, wherever dem occur, gatz end immediately", e add.

Guterres stress di UN support for "meaningful efforts towards a just, lasting and comprehensive peace wey fully uphold Ukraine sovereignty, independence and territorial integrity".

Sunday double missile strike na di deadliest attack on civilians in Ukraine dis year.

Another Russian missile attack, earlier dis month on 4 April, bin kill 20 pipo and injure 61 for di city of Kryvyi Rih.

On dat occasion, Russia defence ministry say dem don target a meeting of "unit commanders and Western instructors" for one restaurant. Dem no provide any evidence.

E dey estimated say hundreds of thousands of pipo - di vast majority of dem soldiers - don dey killed or injured on all sides since Russia launch a full-scale invasion of Ukraine on 24 February 2022.

Di UN estimates say nearly seven million Ukrainians dey currently living as refugees.

Di conflict go back more dan ten years, to 2014, wen Ukraine pro-Russian president bin dey overthrown. Russia den annexe di Black Sea peninsula of Crimea and back insurgents in bloody fighting for eastern Ukraine.

Meanwhile, Ukraine President Volodymyr Zelensky don invite Donald Trump to visit im kontri ahead of any deal wit Russia to end di war.

"Please, bifor any kind of decisions, any kind of forms of negotiations, come see pipo, civilians, warriors, hospitals, churches, children destroyed or dead," Zelensky tok for one interview for CBS 60 Minutes programme.