Hollywood actor Val Kilmer, known for im roles inside some of di biggest movies of di 1980s and 90s, including Top Gun and Batman Forever, don die at di age of 65.

E aslo act for 1991 The Doors - wia e play di ogbonge band frontman Jim Morrison - plus di Western Tombstone and crime drama Heat.

Kilmer die of pneumonia on Tuesday for Los Angeles, im daughter Mercedes tell US media. She say her father bin dey diagnosed with throat cancer for 2014 but later recover.

Tracheotomy surgery affect im voice and limit im acting career, but e return to di screen to for di role as fighter pilot Iceman along wit Tom Cruise for di 2022 Top Gun: Maverick.

Paying tribute, Heat director Michael Mann say: "While working with Val on Heat I always wonder at di range, di brilliant variability within di powerful current of Val possessing and expressing character.

"After so many years of Val battling disease and maintaining his spirit, dis na very sad news," Mann write on Instagram.

"See ya, pal. I go miss you", US actor Josh Brolin write togeda wit a picture of imself and Kilmer for Instagram.

"You be a smart, challenging, brave, uber-creative firecracker. Dem no plenty like dat again", e add.

Van Kilmer biography

Born Val Edward Kilmer on 31 December 1959, Kilmer grow up for a middle-class family for Los Angeles.

Im parents be Christian Scientists, movement wey Kilmer follow for di rest of im life.

Aged 17, e become di den-youngest pupil to enrol for di Julliard School, inside New York, one of di world most prestigious drama conservatories.

E make im name inside di comedies Top Secret! for 1984 and Real Genius di following year, before e cement im acting credentials as Iceman, di nemesis to Crusie character Maverick inside 1986 Top Gun, one of decade ogbonge movies.

Kilmer go on to star inside fantasy Willow and crime thriller Kill Me Again - both togeda wit British actress Joanne Whalley, wey e marry for 1988. Di couple get two children.

E go on to prove im dynamic and versatile talents wen e convincingly play rock frontman Morrison for The Doors, 20 years after di singer death.

Tombstone, wia e play gunfighter Doc Holliday, and Heat, wia e appear togeda wit Al Pacino and Robert De Niro, also be hits.

E take over Batman cape from Michael Keaton for Batman Forever for 1995, wey achieve box office success but mixed reviews, and Kilmer pull out of di next Batman movie.

For 1997, e appear inside The Saint as di master criminal and master of disguise - based on Leslie Charteris books, wey bin also inspire di 1960s TV show wit Roger Moore.

Kilmer also act as Marlon Brando crazy sidekick for The Island of Dr Moreau for 1996 - but dat film become one of Hollywood most notorious flops.

Im director John Frankenheimer declare say e go never work again with Kilmer, wey get a reputation for being difficult on set.

For 2021, Kilmer release one documentary about di highs and lows of im life and career. Val, wey come out for di Cannes Film Festival, feature 40 years of home recordings, including of am dey speak with a voice box post-cancer surgery.

E bin continue acting, but im comeback as Iceman for di long-awaited Top Gun sequel na ogbone one.

Cruise tk at di time: "I don know Val for decades, and for am to come back and play dat character... E be such a powerful actor wey e instantly become dat character again."