Sweden ta gayyaci Ibrahimovic mai shekara 41

Tawagar Sweden ta gayyaci Zlatan Ibrahimovic, mai shekara 41, domin ya buga mata wasannin neman gurbin shiga gasar nahiyar Turai ta Euro 2024.

Kawo yanzu shekara daya kenan rabon da ta mika masa goron gayyata domin buga mata tamaula.

Sweden za ta fafata da Belgium da kuma Azerbaijan a cikin watan nan na Maris.

Dan kwallon AC Milan ya yi jinyar mai tsawo, sakamakon raunin da ya ji.

Ya yi ritaya da buga wa Sweden tamaula bayan Euro 2016 daga baya ya koma taka leda a 2021, inda kasar ta kasa samun tikitin shiga kofin duniya a Qatar a 2022.

Ibrahimovic, ya buga wa AC Milan wasa uku a bana, fafatawa ta karshe da ya yi wa Sweden ita ce da Poland da suka yi rashin nasara a neman zuwa Qatar.

Tsohon dan kwallon Manchester United da Paris St-Germain, shine kan gaba a ci wa Sweden kwallaye a tarihi mai 62 a wasa 121.