Rivers political crisis - Wetin don happun so far as pro-Wike Lawmakers dump PDP for APC

Di ongoing political drama for Rivers State don take anoda turn as majority members of di Rivers State House of Assembly led by Speaker Martins Amaewhule don defect from di Peoples Democratic Party (PDP) to di All Progressives Congress (APC).

Dis one happen on Monday, 11 December 2023.

According to di individual letters wey di members write - dem say di reason for di defection na sake of di division wey dey di PDP wit as e concern di controversy about di National Secretary of di party wey don make communication channel difficult. Na Martins Amaewhule read di letters.

Dem say di confusion wey surround di position of di National Secretary don generate many court cases by members of di party for various courts wey don divide di party.

Na for Ocrober kasala burst for di politics of Rivers state wey dey South South Nigeria.

All di wahala start wen tori come out say plan dey to impeach Siminialayi Fubara as govnor of Rivers state.

Wetin don happun so far;

• 29 October: Burning of di main shambers of di state Assembly for night.

• 30 October: 24 Members hold sitting inside di auditorium of di Assembly wey dem burn. Dem also Edison Ehie as leader of di House and three oda lawmakers wey include Sokari Goodboy Sokari Ahoada West constituency, Victor Oko Jumbo wey dey represent Bonny constituency, and Adolphus Oruibienimigha wey dey represent Opobo/Nkoro constituency.

• Same day, anoda faction of di Aseembly elect Edison Ehie as Speaker of di 10th Assembly and suspend some erring lawmakers

• 31 October: Some youths and groups do solidarity demonstration for support of govrnor Fubara for Port Harcourt.

• 1 November: State High Court for Isiokpo grant restraining order on Impeachment of Rivers state govnor. Di court grant interim order restraining di Rivers state house of assembly, di speaker of di House, deputy dpeaker, clerk of di House and di chief judge of di state from carrying out any action wit respect to di impeachment of di govnor of pending di determination of di Motion on Notice.

• Fubara say di political crisis involving im and im predecessor, Nyesom Wike, go soon dey resolved as "nothing dey wrong for a father and a son to get problems."

• 7 November: Fededal High Court for Port Harcourt issue order make all di factions of di Aseembly no take any action until di mata wey dey before di cour dey resolved. Na Edison Ehie carry di mata go court.

• 20 November: Alleged assassination attempt on Edison, by police officers but Commissioner of Police Rivers State Olatunji Disu say na routine patrol of police officers not assassination attempt.

• 20 November: 25 lawmakers of hold sitting for di assembly complex wia dem ask di Police to prosecute those wey dey behind di burning of di chambers of di Assembly on 30 October 2023.

• 24 November: Federal High Court for Port Harcourt issue Form 48 against Martins Amaewhule and im Deputy Dumle Maol for Contempt of Court becos dem violate di order of court for all parties to maintain status quo by holding a sitting for Assemby Complex on Monday 20 November 2023 and deliberating on some matters.

• Official circular come out for di transfer of di clerk and deputy clerk of di House out of di Assembly in line with Civil service rules but Martins Amaewhule also issue statement to counter di circular of transfer say di officers na Legislative staff.

• Minister of Federal Capital Territory FCT Abuja, Nyesom Wike accuse dFubara say e dey behind di burning of di State Assembly complex.

• 4 December: State High Court for Isiopko adjourn to 20 December to hear di case Fubara against di Rivers State House of Assembly, di Speaker, Deputy Speaker, di clerk and di Chief Judge of di State.

• 7 December: Federal High Court Abuja grant order wey empower di Rivers State House of Assembly to perform dia constitutional functions witout any restrictions.

• Monday 11 December 2023: Majority lawmakers led by Martin Amaewhule defect from di PDP to di APC.