Rashford ya kamo Sallah wurin lashe gwarzon gasar Firemiya na wata-wata

An bai wa dan kwallon Manchester United, Marcus Rashford kyautar gwarzon dan kwallon gasar Firemiya na watan Fabarairu, kyauta a karo na uku a kakar wasa ta bana.

Hakan ya sa Rashford ya kamo bajintar Mohamed Salah na Liverpool.

A kakar wasa ta 2017 zuwa 2018 ne Salah ya kafa tarihi a gasar.

Rashford ya lashe kyautar a watan Satumba da Junairu da kuma Fabarairu.

Shi ma Erik ten Hag ya samu kyautar manaja mafi bajinta a karo na biyu.

Rashford ya zura kwallo 26 a kakar wasa ta bana kuma shi ne dan kwallo na farko da ya ci kyautar sau biyu a jere tun bayan Ilkay Gundogan na Manchester City a watan Janairu da Fabarairun 2021.

Ten Hag, wanda ya lashe kyautar a watan Satumba da Fabarairu ya jagoranci United ta lashe gasar EFL a bana. Kofi na farko a cikin shekaru shida.