Messi ya samu tayi daga Inter Miami, Benzema da Modric za su je Saudiyya

Inter Miami sun gabatar da tayin yuro miliyan 50 duk shekara akan ɗan wasan Argentina Lionel Messi a kwantiragin da suke fatan ya yi wasan kaka hudu a MLS bayan ya bar Paris St-Germain a wannan kaka. (Sport)

Ɗan wasan gaba a Faransa Karim Benzema, mai shekara 35, zai koma kungiyar Al-Ittihad ta Saudiyya inda kwantiraginsa a Real Madrid ya kare a wannan watan. (ESPN)

Mai buga tsakiya a Croatia Luka Modric, mai shekara 37, ya faɗawa Real Madrid cewa zai karɓi tayin yuro miliyan 120 da aka gabatar masa a Saudiyya a yarjejeniyar kaka uku. (Okdiario via Sport)

Newcastle ta shirya gogayya da Manchester United a zawarcin ɗan wasan Najeriya Victor Osimhen, mai shekara 24, da ke wasa a Napoli. (Gazzetta dello Sport via Mirror)

Ɗan wasan West Ham da Ingila Declan Rice zai fi son zama a kungiyar firimiya maimakon tafiya Bayern Munich, ita ma Arsenal da Manchester United duk na zawarcinsa. (Mail)

Manchester City na gab da cimma yarjejeniya kan ɗan wasan Croatia Mateo Kovacic, mai shekata 29, daga Chelsea. (Football Insider)

Kocin Celtic Ange Postecoglou na iya zama sabon kocin Tottenham a mako na gaba. (Sun)

Sam Allardyce, mai shekara 68, ba zai samu daman ci gaba da horar da Leeds ba, bayan gaza nasara a wasanni hudu. (Telegraph)

Ɗan wasan Manchester City Joao Cancelo da kamar wuya ya koma Bayern Munich a zaman dindindin, sannan ɗan wasan mai shekara 29 ba shi da ra'ayin cigaba da zama a Ingila - ko kuma ya amsa tayin da yake samu daga Arsenal. (Abendzeitung - in German)

Bayern a shirye take ta karɓi tayi kan 'yan wasanta na gefe Serge Gnabry da Leroy Sane, dukka 'yan shekara 27 a wannan kaka, da kuma ɗan wasan gaba asalin Senegal Sadio Mane - wanda shekara guda kenan da barowarsa Liverpool. (Mail via Bild)

Chelsea tayi watsi da tayin fam miliyan 30 da Brighton ta gabatar mata kan ɗan wasanta mai shekara 20 Levi Colwill, wanda ya shafe wannan kaka a zaman aro a Seagulls. (Mail)

Inter Milan ta buɗe wuta a kokarin sayo ɗan wasan Chelsea Trevoh Chalobah, mai shekara 23. (Standard)

Atalanta na son yuro miliyan 60 a wannan kaka kafin ta saki Rasmus Hojlund, mai shekara 20 daga Denmark wanda Manchester United ke hari. (Football Insider)

Wolves ta bi sahun West Ham, Newcastle da Aston Villa a zawarcin ɗan wasan Southampton James Ward-Prowse, 28. (Sun)

Barcelona na son sayar da ɗan wasanta na gaba Ansu Fatu a wannan kaka, sai dai ɗan wasan na adawa da komawa Wolves, kan yarjejeniyar yuro miliyan 30 da kuma musayarsa da Ruben Neves mai shekara 26. (Sport)

Napoli ta shirya shiga fafatawa da AC Milan kan ɗan wasan Arsenal mai shekara 21, Folarin Balogun a wannan kaka. (Mirror)

Ɗan wasan gaba a Sifaniya Marco Asensio, mai shekara 27, ya yanke hukuncin komawa Paris St-Germain idan kwantiraginsa ya kare da Real Madrid a wannan kaka. (Athletic - subscription required)