Manyan ƴan takarar gwamnan jihar Nasarawa

« Prev

Comments (0)

Listen to Article

Hoton yan takarar gwamnan jihar Nasarawa

Jihar Nasarawa wadda ke yankin arewa ta tsakiyar Najeriya - na cikin jerin jihohin ƙasar da za a yi zaɓen gwamna da na 'yan majaisar dokokin jihar ranar 18 ga watan Maris.

Nasarawa jiha ce mai yawan ƙananan hukumomi 13 kuma tana da yawan masu rijistar zaɓe 1,899,244.

Akwai 'yan takarar 14 da ke fafatawa a zaɓen gwamnan jihar na ranar Asabar, sai dai ana ganin zaɓen zai fi zafi ne tsakanin jam'iyyar APC mai mulkin jihar da kuma PDP da NNPP masu hamayya.

Abdullahi Sule - APC

Abdullahi Sule - wanda injiniya ne, ya yi karatu a jami'ar jihar Indiana ta Amurka, inda ya samu digirinsa na farko da na biyu a fannin fasahar masana'antu.

Kafin shiga harkokin siyasa a shekarar 2018, Abdullahi Sule ya yi aiki a kamfanoni da dama a ciki da wajen Najeriya, inda ya riƙe manyan muƙamai.

Ranar ɗaya ga watan Oktoban 2018 ya samu nasara a zaɓen fitar da gwani na takarar gwamnan jihar a ƙarƙashin jam'iyyar APC.

Ya samu nasara a zaɓen gwamnan da aka gudanar a shekarar 2019, inda yanzu yake neman wa'adin mulki na biyu a ƙarƙashin jam'iyyar ta APC.

Emmanuel David Umbugadu - PDP

David Emmanuel Ombugadu na jam'iyyar PDP ɗan siyasa ne wanda ke da digiri na biyu daga jami'ar kimiyya da fasaha ta jihar Rivers.

Tsohon ɗan majalisar wakilai ta tarayya ne mai wakiltar ƙananan hukumomin Akwanga da Wamba da kuma Nassarawa Eggon daga 2011 zuwa 2019.

Sannan kuma ya yi takarar kujerar gwamnan jihar a jam'iyyar PDP a shekarar 2019, inda ya sha kaye a hannun Abdullahi Sule na jam'iyyar APC.

Yakubu Abdullahi Maidoya - NNPP

Ɗan kasuwa kuma dan siyasa, ana masa kallon mutumin da ke samun ƙarbuwa a harkokin siyasar jihar Nasarawa.

Maidoya ya kasance shugaban kamfanin Maiyamco Investment Nig, kamfanin da ke da rassa a jihohin Najeriya 19.

Yakubu Abdullahi Maidoya na takarar kujerar gwamnan jihar a ƙarƙashin inuwar jam'iyyar NNPP.