Man Utd na zawarcin dan wasa daga Benfica, Chelsea za ta biya £100m kan Osimhen

Manchester United na zawarcin dan wasan Benfica da Portugal Goncalo Ramos, mai shekara 21, wanda ke iya barin kungiyarsa kan yuro miliyan 120.(Record, via Goal)

Dan wasa Evan Ferguson, mai shekara 18, zai yi watsi da tayin Manchester United saboda dan wasan asalin Jamhuriyar Ireland da ke wasa a Brighton yana ganin zamansa a inda yake a yanzu za ta fi taimakawa ya sake ginuwa. (Sun)

Manchester United a wani bangare kuma na duba yiwuwar saye mai tsraon raga a Brentford David Raya, a madadin David de Gea da har yanzu bai aminta da sabon kwantiraginsa da ita ba.(Give Me Sport)

Chelsea ta shirya biyan £100m kan dan wasan Najeriya da take hari, Victor Osimhen, mai shekara 24, daga Napoli. (Football Insider)

Chelsea na tattaunawa da dan wasan Faransa N'Golo Kante, mai shekara 31, kan sabon kwantiragin shekara biyu. (Fabrizio Romano)

Kungiyar ta nuna rashin jindadinta da yunkurin tsohon kociyanta Thomas Tuchel, na neman rabata da Anthony Barry zuwa Bayern Munich. (Telegraph)

Arsenal za ta bada fifiko kan saye dan wasan Brighton da Ecuador Moises Caicedo, a wannan kaka. (Football Transfers)

Aston Villa da Newcastle da Brighton na son dauko dan wasan tsakiya na Ingila Alex Oxlade-Chamberlain, wanda kwantiraginsa da Liverpool ke karewa a karshen kaka. (Mail)

Newcastle na son dan wasan Southampton mai bugawa Ingila tsakiya James Ward-Prowse, mai shekara 28. (Football Insider)

Barcelona ta kawar da batun sayo dan wasan Portugal mai taka leda a Wolves Ruben Neves, a wannan kaka. (Fichajes - in Spanish)

Dan wasan Sifaniya Sergio Busquets, mai shekara 34, har yanzu bai cimma matsaya kan sabon kwantiragi a Barcelona ba. (Mundo Deportivo - in Spanish)

Chelsea da Arsenal na fafutika kan dan wasan Everton Amadou Onana, mai shekara 21. (Fichajes - in Spanish)

Shugaban kungiyar kwallon kafa ta Brazil ya ce kocin Real Madrid Carlo Ancelotti, mai shekara 63, zai dace da tawagar ‘yan kwallon kasar. (Reuters)