Kocin Jamus biyar ne suka ci Champions League a tarihi

'Yan kasar Jamus masu horar da tamaula uku ne da suka lashe Champions League a jere a shekarun nan, kuma wadanda suka yi aikin koci a gasar Bundesliga.

Jumulla masu horar da tamaula 'yan kasar Jamus biyar ne suka yi wannan bajintar da kuma lashe Champions League bakwai tsakaninsu.

Wanda ya daga kofin bana shi ne tsohon kocin Mainz da Borussia Dortmund, Tuchel, wanda ya ja ragamar Chelsea ta doke Manchester City 1-0 ranar Asabar.

Tuchel ya bi sahun Klopp da ya dauka a Liverpool da kuma Flick wanda ya lashe Champions League a Bayern Munich.

Tsohon mai horar da Mainz da Dortmund, Klopp ya jagoranci Liverpool ta yi nasara lashe kofin a 2018/19, shi kuwa Flick ya yi bajinta a Bayern Munich, inda kungiyar ta lashe kofi shida a 2019/20.

Hakan na nufin koci biyar daga Jamus ne suka ci Champions League, tun bayan da aka sauya fasalin gasar a 1992 daga European Cup.

Sauran biyun sun hada da Jupp Heynckes a 1997/98 a Real Madrid da kuma 2012/13 a Bayern da kuma Ottmar Hitzfeld a 1996/97 a Dortmund da kuma a 2000/01 a Bayern.

Jupp Heynckes da kuma Ottmar Hitzfeld sune kadai suka lashe Champions League 'yan kasar Jamus kuma sau bibiyu.

Tsakanin Klopp da Tuchel tsoffin kocin Mainz da Dortmund sun kai wasan karshe karo hudu a Champions League a tsakaninsu.

Koma kowanne daga cikinsu an buge shi a kai wa karawar karshe a kakar tamaula da wata ta zagayo sai ya kara kwazo ya kuma lashe Champions League.

Klopp wanda ya buga wa Mainz wasa 340 a matakin dan wasa ya kai kungiyar Bundesliga a karon farko da ya karbi aiki a 2003/04.

Bayan kaka bakwai a Mainz daga nan ne Kloop ya koma Dortmund da horar da tamaula a 2008.

A kungiyar da ya ci Bundesliga biyu a jere a kakar 2010/11 da kuma 2011/12 da karin cin wasu kofunan gasar Jamus a kungiyar.

Daga nan ne Dortmund ta wakilci Jamus a Champions League a 2013, inda karawar karshe ta kasance tsakanin kungiyoyin Bundesliga, inda Heynckes na Bayern ya lashe.

Daga nan ne Kloop ya yi jira har kaka shida, kafin daga baya ya lashe gasar ta Zakarun Turai.

Tuchel ya bi sawun matakin da Klopp ya yi na jan ragamar Mainz da Dortmund, wanda ya kai Mainz gasar Zakarun Turai a karon farko a tarihin kungiyar, sannan ya lashe DFB a Dortmund a 2017.

Kuma Flick ne ya hana Tuchel cin kofin Champions League a 2020, bayan da Paris St Germain ta yi rashin nasara a hannun Bayern Munich da ci 1-0.

Bayan da Tuchel ya yi rashin nasara a hannun Flick a 2019/20, daga nan ne kocin ya kara kwazo ya kuma lashe Champions League a Chelsea kuma a karon farko a 2020/21.

Flick ya yi bajintar cin kofi shida a kakar farko da ya ja ragamar Bayern Munich ciki har da DFB Cup da Champions League da FIFA Club World Cup da German Cup da kuma European Supercups.

Flick ya kuma kara cin kofin Bundesliga a kakar 2020/21 ya kuma ajiye aiki da cewar zai maye gurbin Joachim Low da zarar an kammala gasar cin kofin nahiyar Turai ta bana.

Tun a bara ya kamata a bugu gasar cin kohin nahiyar Turai, amma cutar korona ta kai tsaikon da aka daga wasannin zuwa 2021.