Kasuwar 'yan kwallo: Makomar Aarons, Sancho, Klinsmann, Cavani, Bentaleb, Lamela, Telles

West Ham ta bi layin Barcelona da Bayern Munich da kuma Tottenham wajen neman dan wasan baya na Norwich City na tawagar Ingila ta 'yan kasa da shekara 21 Max Aarons, inda kungiyar da za ta tsallaka gasar Premier League take neman akalla fam miliyan 30 a kan dan wasan mai shekara 21. (Jaridar Independent)

Ga alama damar da Manchester United ke da ita ta daukar dan wasan gaba na Ingila Jadon Sancho, mai shekara 21, daga Borussia Dortmund ta karu bayan da labara ya bayyana cewa mataimakin shugaban kungiyar Ed Woodward zai tafi. (Jaridar Star)

Burnley na sha'awar sayen dan wasan tsakiya dan Algeria Nabil Bentaleb daga Schalke a bazara, inda kila dan wasan mai shekara 26 ya kasance bas hi da wata kungiya a lokacin, kasancewar ba lalle ba ne ya kulla yarjejeniyar ci gaba da zama a kungiyar ta Jamus. (Jaridar Sun)

Dan wasan gaba na kasar Uruguay Edinson Cavani, mai shekara 34, ya gana da shugabannin Manchester United inda ya jaddada musu aniyarsa ta barin kungiyar domin ya koma kusa da iyalinsa a Latin Amurka. A 'yan watannin ana bayar da rahotannin cewa dan wasan zai koma Boca Juniors. (Jaridar Depo).

Ga alama Liverpool ta rasa dan wasan da ta dade tana harin dauka Ugurcan Cakir, mai shekara 25, bayan da Borussia Dortmund ta taya golan na kungiyar Trabzonspor da Turkiyyar. Rahotanni na cewa Aston Villa da Atletico Madrid ma na son mai tsaron ragar mai shekara 25. (Jaridar Fotospor)

Kociyan Aston Villa Dean Smith y ace kungiyar ba ta da niyyar rike dan wasan tsakiya na Chelsea da kuma Ingila Ross Barkley, mai shekara 27, don zaman dindindin idan lokacin zaman aronsa yak are a karshen kakar nan. (Jaridar Mirror)

Tsohon gwanin dan wasan Jamus Jurgen Klinsmann y ace komai mai iya yuwuwa ne bayan da wasu rahotanni ke danganta tsohon dan wasan gaban na Tottenham da komawa kungiyar a matsayin kociya. (Jarida ESPN)

Roma na shirin ganawa da wakilan Jannik Vestergaard a shirin da kungiyar ke yin a sayen dan bayan na Southampton da Denmark mai shekara, 28, wanda kuma Tottenham da Juventus ma ke so.(Jaridar Tuttomercatoweb)

Dan wasan tsakiya na Arsenal Joe Willock mai shekara 21 ya ce yana son ci gaba da zama a Newcastle United a kaka ta gaba, saboda ya ji dadin zaman aronsa na shekara daya a kungiyar ta St James' Park. (Jaridar Football Insider)

Juventus ta ce za ta iya bayar da dan wasan tsakiya na Faransa Adrien Rabiot mai shekara 26 ga Manchester United a matsayin wani bangare na cinikin dan bayanta dan kasar Brazil Alex Telles, mai shekara 28. (Jaridar Calciomercato)

Dan wasan gaba na gefe na Tottenham Erik Lamela, mai shekara 29, a shirye yake ya bar kungiyar ta birnin Landan domin komawa Italiya, inda aka ce Napoli da AC Milan na sha'awar dan wasan na Argentina. (Jaridar Area Napoli)

Kungiyar Sassuolo ta sanya farashin akalla fam miliyan 13 a kan dan was anta na gaba Giacomo Raspadori, mai shekara 21, wanda rahotanni ke cewa Inter Milan da Juventus na nemansa. (Jaridar Calciomercato)