Gavi ya sha kuka bayan raunin da ya ji daf a fara gasar kofin duniya

Barcelona ta caskara Ahletic Bilbao 4-0 a wasan mako na 11 a gasar La Liga ranar Lahadi a Nou Camp. Sai dai batun da ya fi jan hankali, shi ne raunin da matashin dan wasan Barcelona, Gavi ya ji bayan da kasa da wata daya a fara gasar cin kofin duniya. Dan wasan wanda ya lashe gwarzon matashi a kyautar Kopa Trophy da kuma Golden Boy a 2022, sai sauya shi aka yi a fafatawar. Ya ji rauni ne bayan taho mu gamu da ya yi da dan kwallon Bilbao, Dani Garcia. Bayan da aka duba lafiyarsa, Gavi ya yi kokarin ci gaba da wasan, amma sai ya kara kwantawa a cikin fili yana kuka ya kuma rike kafarsa ta hagu. Ba a fayyace girman raunin da ya ji ba, sai dai Xavi ya yi watsi da batun cewar dan wasan ba zai buga gasar kofin duniya ba da za a yi a Qatar Za a fara gasar kofin duniya daga ranar 20 ga watan Nuwamba zuwa 18 ga watan Disambar 2022. Mai shekara 18 yana cikin kashin bayan 'yan wasan Barcelona da tawagar Sifaniya karkashin koci Luis Enrique. Sifaniya za ta fara buga wasan kofin duniya nan da kasa da wata daya a karawar da za ta yi da Costa Rica.