Carvajal ba zai buga wasan da Real za ta je Chelsea ba

Kungiyar kwallon kafa ta Real Madrid ta sanar cewar Dani Carvajal ya yi rauni a lokacin atisaye ranar Alhamis.

Hakan ya sa kungiyar ta ci gaba da samun karin 'yan wasanta da ke jinya a kakar tamaula ta bana.

Wasu jaridun cikin gida a Spaniya sun ce Carjajal, mai tsaron baya, ba zai buga wa Real wasan da za ta yi da Chelsea a Ingila a Champions League ba karawa ta biyu.

Haka kuma dan kwallon ba zai yi wa kungiyar wasu wasan La Liga ba a shirin da kungyar ke yi na kare kofin da take da shi na bara.

Real wadda take ta biyu a teburin La Liga da maki 71, za ta fuskanci Osasuna ranar Asabar a gasar ta Spaniya.

Sai dai Real Madrid ba ta fayyace ranar da Carvajal zai warke da ranar da zai fara karbar horo ba.

Mai tsaron baya na Real Madrid ya buga wasa 15 a dukkan fafatawa a kungiyar a bana, sakamakon raunin da ya ke ta jinya

Lucas Vazquez wanda yake maye gurbin Carvajal ya yi raunin da zai yi jinya zuwa karshen kakar bana.

Shi kuwa kyaftin, Sergio Ramos wanda ya sha fama da jinya bai buga wa Real wasa tara ba, Ferland Mendy bai buga Champions League da Chelsea a Spaniya ba.

Wasu rahotanni daga Spaniya na cewa Marcelo ba zai buga wa Real wasa na biyu a Ingila da Chelsea ba, wanda aka ce zai yi aiki a wata rumfar zabe a gundumar Madrid.