Lucas Ribeiro Costa don end im contract wit South Africa club Mamelodi Sundowns as e dey eye to become di first footballer to benefit from Lassana Diarra legal victory against Fifa.

Di Brazilian forward Ribeiro, wey im goal against Borussia Dortmund for June dey voted as best of di Fifa Club World Cup, don also carry im case to world football govning body.

Di 26-year-old dey represent by Belgian lawyer Jean-Louis Dupont, wey also win di landmark 1995 case wey involve Jean-Marc Bosman and dey also represent Diarra.

Di former France midfielder Diarra don dey inside long-running legal battle wit Fifa and for October di Court of Justice of di European Union (CJEU) find say some of Fifa transfer rules break European Union laws.

Diarra play as defensive midfielder for im club career for clubs like Chelsea, Arsenal, Portsmouth, Real Madrid and Paris Saint-Germain bifor e retire for 2019.

Afta Diarra end im contract wit Lokomotiv Moscow for 2014, Fifa come refuse to provide am wit international transfer certificate (ITC) for proposed move to Belgian club Charleroi for 2015.

Di CJEU find say Fifa show say dia rules "go against di free movement of professional footballers wey wish to develop dia activity by going to work for new club".

Afta dat incident, Fifa bin korrect and amend dia transfer regulations.

Howeva, Diarra don restart legal proceedings wia e dey seek for £56million compensation.

Di case of Lucas Ribeiro Costa vs Mamelodi Sundowns

Lawyer Dupont say Qatar SC bin make Mamelodi Sundowns offer for Ribeiro wey dey "well above di player valuation" and e wish to join di Qatari top-flight club.

Dem claim say di South African champions bin no make di deal possible becos di club dey push di price go high.

Di lawyer say Mamelodi Sundowns bin "attempt to drive up di price, again and again, for unreasonable manner, witout any regard for di player personal interests, wey make di deal impossible".

E add say Ribeiro end im contract, wey suppose expire for 2028, on 1 August.

Lawyer say di former Charleroi and Beveren player get "no oda choice" dan to defend im interests for Fifa tribunal.

"Sake of di Diarra ruling by di CJEU, no doubt say di gbege dispute between me and my former club no go prevent me from continuing my career wit peace of mind," Ribeiro say.

"Indeed, following dia own regulations (as amended in light of di Diarra judgement), Fifa go see to am say di international transfer certificate dey immediately deliva upon request by my future employer."

Di statement tok say Ribeiro dey willing to take di matter to di Court of Arbitration for Sport or state court, and e don get interest from various clubs including some wey dey Europe.

"I go now consider wetin be best for di future of my career in order to make di right choice," Ribeiro add.

Ribeiro add say di gbege wey im dey now no go affect im next employer in any form.

"As reminder, sake of di Diarra ruling, my next employer no go dey involved for di dispute between me and Mamelodi Sundowns, neither from disciplinary perspective nor financially."