Ashley Young zai bar Aston Villa bayan kaka biyu

Mai tsaron baya, Ashley Young zai bar Aston Villa, bayan shekara biyu a kungiyar da kwantiraginsa ya kare a karshen kakar nan.

Tsohon dan kwallon tawagar Ingila, ya buga wa Villa karawa 32, wadda ta yi ta bakwai a Premier League da samun gurbin shiga Europa Conference League na badi.

Mai shekara 37 ya koma Villa a 2021 daga Inter Milan kan yarjejeniyar kaka daya, kafin kwantiraginsa ya kare a lokacin.

Tun farko ya fara tamaula a Villa daga 2007 zuwa 2011 daga nan ya koma Manchester United, wadda ya yi wa fafatawa 250.

Kafin ya sake komawa Villa Park, Young yana cikin 'yan wasan Inter Milan da suka dauki Serie A cikin kaka daya da ya taka leda a Italiya.

Ya kuma dauki kofuna da yawa a United ciki har da Premier League da Europa League da FA Cup da EFL Cup a kungiyar ta Old Trafford.