You are here: HomeAfricaBBC2021 04 16Article 1234264

BBC Hausa of Friday, 16 April 2021

Source: BBC

Arsenal ta fatattaki Slavia Prague daga Europa League

Kyaftin Arsenal a wasan Lacazette ya ci kwallo biyu cikin hudu Kyaftin Arsenal a wasan Lacazette ya ci kwallo biyu cikin hudu

Arsenal ta kai wasan daf da karshe a gasar Europa League, bayan da ta je ta doke Slavia Prague da ci 4-0 a wasan zagaye na biyu a quarter finals.

Arsenal ta ci kwallayen ta hannun Nicolas Pepe a minti na 18 da fara tamaula, sanan Alexandre Lacazette ya ci na biyu a bugun fenariti a minti na 21.

Minti hutu tsakani Gunners ta kara na uku ta hannun Bukayo Saka, sannan Lacazette ya kara na hudu na biyu da ya ci a wasan da hakan ya kai ta matakin daf da karshe.

Arsenal din ta kai wannan matakin da cin kwallaye 5-1 gida da waje kenan, bayan da suka tashi 1-1 a makon jiya a Emirates.

Arsenal tana ta tara a kan teburin Premier League mai maki 45, kuma saura wasa bakwai ta karkare karawar bana.

Ranar Lahadi 18 ga watan Afirilu Gunners za ta karbi bakuncin Fulham a gasar Premier League da za su kece raini a Emirates.

Fulham ita ce ta 18 wato cikin 'yan ukun karshen teburi da maki 26 da tazarar maki 10 tsakaninta da Newcastle ta 17.