You are here: HomeAfricaBBC2022 01 14Article 1444513

BBC Pidgin of Friday, 14 January 2022

Source: www.bbc.com

Prince Andrew: Duke of York lose military titles and use of His Royal Highness

Di Duke of York military titles and royal patronages don return back to di Queen, Buckingham Palace tok.

Prince Andrew wey be 61 years old go also stop using di style His Royal Highness for official capacity, one royal source tok.

Dis dey come as e dey face one US civil action over sexual assault allegations - dis na claim wey e don constantly deny.

One source close to di duke tok say e go "continue to defend imsef" against di case wey Virginia Giuffre carry go one New York court.

But di source insist say one judge ruling on Wednesday wey say civil action fit proceed, "no be judgement on di merits of Ms Giuffre's allegations".

Buckingham Palace tok for statement say: "With di Queen approval and agreement, di Duke of York military affiliations and Royal patronages don dey return to di Queen.

"Di Duke of York go kontinu not to undertake any public duties and go defend dis case as a private citizen."

All Prince Andrew roles don dey return back to di Queen with immediate effect, and go dey redistributed to oda members of di Royal Family, one source tok.

Di issue na something wey dey widely discussed with di Royal Family, di source tok.

Like Harry and Meghan, Prince Andrew retain im title His Royal Highness but no go use am for any official capacity.

One tok-tok pesin for di Ministry of Defence tok say dem no get any comment about di duke military titles wey dey handed back to di Queen, and add say na matter for di Palace.

On Thursday, one letter - release by anti-monarchy pressure group Republic - dey sign by more than 150 Royal Navy, RAF and Army veterans wey ask di Queen to strip Prince Andrew of im eight British military titles.

Lt Stuart Hunt, wey serve for di 1st Royal Tank Regiment and sign di letter, welcome di prince losing im military titles but suggest say di mata suppose to dey settled sooner.

Di 52-year-old tell PA News Agency say: "Na unsavoury business... I just dey glad say e no dey associated with di military now.

"Weda e dey guilty or not, e don bring things into disrepute... E no dey fit to serve for honorary rank. E don forgone dat right by getting into dis sort of situation."

Di duke get 22-year career for di Royal Navy, and serve as helicopter pilot during di Falklands War.

Di latest Palace announcement mean say e don lost military titles including Colonel of di Grenadier Guards - one of di most senior infantry regiments for di British army.

Di oda UK military titles wey e no longer get include:

  • Honorary air commodore of RAF Lossiemouth


  • Colonel-in-chief of the Royal Irish Regiment


  • Colonel-in-chief of the Small Arms School Corps


  • Colonel-in-chief of The Royal Lancers (Queen Elizabeth's Own)


  • Colonel-in-chief of the Yorkshire Regiment


  • Colonel-in-chief of the Small Arms School Corps


  • Commodore-in-Chief of the Fleet Air Arm


  • Royal colonel of the Royal Highland Fusiliers


  • Royal colonel of the Royal Regiment of Scotland.


  • Di duke go also lose several overseas honorary roles wey include colonel-in-chief of di Royal Highland Fusiliers Of Canada, Colonel-in-chief of the Royal New Zealand Army Logistic Regiment, Colonel-in-chief of di Princess Louise Fusiliers of Canada, Colonel-in-chief of the Queen's York Rangers (1st American Regiment).

    But e go retain im service rank of Vice-Admiral, di Palace don confirm.

    As ex-member of di armed forces, dem promote am in line with e still-serving peers and make am Vice-Admiral by di Navy on im 55th birthday for 2015.

    Di duke dey due to dey promoted to Admiral on im 60th birthday for 2020, but asked make dem defer dis afta stepping back from public duties for 2019.

    At di time, di Palace tok say im oda military appointments don dey suspended.

    Several oda charities and organisations don cut dia ties with di duke, but e continue to hold dozens of royal patronages - including as patron or member of ogbonge golf clubs, schools and cultural trusts.

    Di chair of di Commons Defence Select Committee, Tobias Ellwood, welcome di returning of di Duke of York military titles and royal patronages.

    E tell BBC Newscast podcast say di duke change in status ahead of di US civil case dey "necessary" to protect di reputation of di military.

    "Prince Andrew already don step back from many of e public duties - I think all of dem, as well - so I think dis na wetin pipo expect, indeed e dey expected, from dis perspective, so I no dey surprise.

    "E dey important say di problems wey Prince Andrew don experience no rob enta di regiments wey e dey represent," oga Ellwood tok.

    Earlier, Giuffre lawyer David Boies tok say money settlement alone no go dey enof for im client - telling BBC she want to dey vindicated.

    Di prince lawyers don argue say make dem dismiss her case, citing one 2009 deal wey she sign with convicted sex offender Jeffrey Epstein.

    But for one 46-page decision, Judge Lewis A Kaplan dismiss Prince Andrew contention wey say di case against am dey "legally insufficient" and fit no go on to dey heard for future trial.

    Giuffre, wey now be 38 years old, file one civil case for New York for August 2021 under di state Child Victims Act, wey allow survivors of childhood sexual abuse to pursue case wey otherwise for dey barred because too much time don pass.

    For court documents wey dem file as part of her civil case against Prince Andrew, Giuffre tok say she be di victim of sex trafficking and abuse by di late billionaire financier, Epstein.

    She allege say part of her abuse involve say dem loan her out to oda powerful men.

    Giuffre claim say Epstein traffic her to have sex with Prince Andrew wen she bin dey 17 years old.

    She allege say di duke abuse her on three occasions - both for di UK and di US - wen she be minor under US law.

    For one interview with BBC Newsnight for 2019, di Queen second son tok say e no get recollection of ever meeting Viginia Giuffre and her account of dem having sex ifor di US and UK "no happun".

    Di duke withdraw from public life shortly afta di interview, wey e use to repeat im denials of Giuffre claims and explain im one-time friendship with Epstein and di late financier girlfriend, Ghislaine Maxwell.

    Last month, jury found Ghislaine Maxwell guilty of recruiting and trafficking underage girls to be sexually abused by Epstein.