You are here: HomeNews2019 03 28Article 733786

General News of Thursday, 28 March 2019


Ghana RTI Bill: After 20 years of ‘tsaskele,’ parliament finally pass Right to Information Bill

Member of RTI Coalition, Samson Lardy Anyenini talk BBC Pidgin say "passage of de Right to Information Bill to law be one thing, but effective den faithful implementation be another, I fit talk say we get long way to go."

"We no for take am easy, we for make sure say de menerz wey for ensure say dem go implement am go do dema work" Mr Anyenini talk.

Right to Information (RTI) Coalition for Ghana say despite say passage of de RTI Bill, e no mean say dem for take tins easy as de implementation be crucial.

Parliament for Ghana pass Right to Information (RTI) Bill late evening on Tuesday afta 20 years since de first draft.

Members of Parliament sit for extra hours before dem finally do third reading of de RTI Bill, ryders what left be say de President for assent en signature to am so say e go turn law.

Second Deputy Speaker who chair de sitting, Alban Bagbin announce afta de third reading say;

"E be de right of de good people pf Ghana to get all de information wey dey from people wey dem give power and trust for and behalf of Ghanaians."

"I think say Ghanaians go now celebrate say we pass dis Bill, we hope say de President go sign de Bill as soon as e catch en office" Mr Bagbin add.

Some Ghanaians praise government sake of President Akufo-Addo promise Ghanaians say he go pass de RTI Bill wey he deliver.

De RTI Bill go make am possible say de Ghanaians get constitutional right to demand information from public office holders and some private entities who dem give power den national resources to work.